Sámi Dáiddamusea lea rabas!

Viimmat lea Sámis, Norggas ja máilmmis musea mii lea oamastahttojuvvon sámi dáidagii! 40 jagi aktivistarahčamušaid, oastimiid, šiehtadallamiid, lobbyismma ja nággárvuođa maŋŋá lávke dáiddamáilbmi ođđa áigái. Stuorra beaivi Sápmái. Stuorra beaivi Norgii. Stuorra beaivi máilbmái.

Alladássásaš dáiddamusea lea erenoamáš mávssolaš Sápmái ja davviguovlluide. Musea galgá leat rájáid rasttideaddji ásahus, kulturguoddi ja arena kulturlonohallama, máhtu, dutkama ja ovddideami várás. Musea galgá oainnusmahttit ja gaskkustit dieđuid sámi dáidaga ja eará álgoálbmotdáidaga birra, erenoamážit áŋgirušadettiinis iežas ulbmillaš gaskkustanbargguin sihke mánáid ja rávesolbmuid várás.

Mii illudit go oaidnit ahte musea viimmat lea duohtan dahkkojuvvon, ja leat hui rámis There Is No dihtii, mii lea šaddan erenoamáš buorre, smiehtastahtti ja vuoigŋašuhtti čájáhus. Otná beaivi lea deavdán musea čaibmasiin, illudemiin, lihkusávaldagaiguin ja ávuin. Odne lea bargodilli dáppe leamaš erenoamáš movttidahtti!